Do të doja...

Sa herë kam dashur të ulem në cepin e një kolltuku e të vështroj jetën time. Të shuaj cdo dritë, të jetë vetëm një vezullimë e lehtë si një kujtim i largët. Të shëtis në duar shishen e verës të lënë përgjysëm nga mbrëmë.

Një herë ikën ti, një herë iki unë dhe një ditë kthehemi të dy. Kthehemi te njëri tjetri, kthehemi në vendin e zakonshëm. Kthehemi aty ku nuk dimë as vetë se cfarë është dhe ku përkasim, është e tashme apo është e shkuar që në e sjellim mbrapsht.

Dua të bëhem spektatore, këtë herë jo vetëm e jotja, e jona! Të shoh si ngjaj jashtë vetes me ty, të lexoj edhe shikimet edhe heshtjen pas një puthje edhe rikthimin në cepat përkatës të dhomës. Të lexoj edhe veten. Si dukem me ty? A i ngjaj më vetes apo marr formën tënde?

A mund ta fotografoj zemrën e mbi tavolinë ta lë si kujtim?

Si një shënim që një pjesë të mirë të vetes, zgjedh te ta besoj ty. Sepse kur ti je aty, drita e mëngjesit ka më shumë ngjyra, sepse nuk gjej më asnjë heshtje në zhurmën e fjalëve. Sepse përtej të gjithave nuk ka asgjë më shumë se sa kaq. Sepse nuk do doja që jetës ti vendosja kornizë kur jeta është melodia më e lirë që nuk mund të pikturohet e as varet në mure. Sepse nuk do të doja, tja besoja askujt zemrën.

Sa herë vij tek ti, është si të kthehem në shtëpi. Ne nuk e humbëm kurrë rrugën për tek njëri tjetri, ndonëse zgjodhëm herë herë rrugë të ndryshme, u kthyem prap në vendin e zakonshëm, ku sot ende nuk e dimë nëse është e tashme apo e shkuar që ne e sjellim mbrapsht. Do të doja që e gjitha të bëhej një skenë e zakonshme e jetës, do të doja që këtë herë të ulem e të vështroj se si dukem me ty, do të doja ta shihja filmin tim të preferuar që zgjodha ta jetoj me ty! 

Do të doja shumë...

Unë po fotografoj zemrën e po ta lë mbi tavolinë. Lutem të mos e vendosësh në kornizë, nuk njoh shpresa të varura që të kenë pulsuar prap, nuk njoh yje të mbetura në mesin e rrugës, nuk kam dëshirë të dëgjoj se si ndihet melodia e heshtjes së zemrës të lënë mënjanë!

Sepse nuk do të doja, tja besoja askujt zemrën, vetëm ty!