Do të vij kur të jetë koha, do të vij kur koha të jetë gati për ty.
Do të vij atëherë kur të gjitha
yjësitë të jenë në vendin e duhur dhe dielli të jetë në anën tënde.
Do të vij kur ti të mos numërosh
rrahjet e zemrës si një kërcënim për minutat që të ikin, por të jesh i ulur në
bregun e ndërgjegjës se jeta është e bukur edhe pa njësi matëse.
Do të vij kur të jetë paqe se
stuhitë i kam njohur dhe i mbaj brenda vetes kur të më duhet të ujis shpirtin e
të cel përsëri.
Unë do të vij kur ti të mos mbash
mëri vetes për atë që nuk ishe dot, do të vij pikërisht për të të mësuar se
jeta ndodh edhe kështu, përballë një pasqyre që paturpësisht të tregon atë që
ti refuzon të shohësh, veten!
Unë do të vij kur zemra mos të të
peshojë më zemërim…
Unë jam festa më e bukur e vetes,
unë do të vij kur ti të jesh gati për një natë të gjatë plot drita e shkëlqim, do
të vij kur ora ime të jetë magjike, kur gjithë duartrokitjet të jenë kthyer për
një spektakël ku pritja të marrë fund me një këngë për zemrën!
Unë do të vij mes fishekzjarresh,
se jeta është festivali më i bukur që jetoj, përtej ditëve dhe ndjesive unë do
të vij kur askush të mos jetë aty dhe përqafimi im të jetë mikpritja e vetme që
do të ngrohë cdo mungesë.
Unë do të vij e ti do të duash që
të qëndroj, sepse ne zgjedhim që në atë gosti, të kemi pranë vetes, njeriun që
nuk bën zhurmë, por sjell dritë, njeriun që nuk na ndërton mure, por që i rrëzon
ato për të lënë diellin mik.
Unë do të vij patjetër sepse jeta
është lufta më e bukur dhe unë jam gati për të qënë në anën tënde, si dielli!
Comments
Post a Comment